Werk as aanlyn Engelsonderwyser en verken so die wêreld.
“Where are you from?” “South Africa.” “Oh, South OF Africa.” “No, SOUTH AFRICA.”
Na ‘n paar jaar van Engels gee oor die internet vanuit Suid-Afrika, het ons besluit om dit een stappie en ‘n paar grense verder te neem… Al wat ‘n mens nodig het, is ‘n skootrekenaar, ‘n tikkie braafheid en ’n teelepel waansin. Die resultaat: 10 lande in 10 maande en ‘n leeftyd se dankbaarheid.
Thailand, Maleisië, Indonesië, Singapoer, Hong Kong, Filippyne, Kambodja, Viëtnam, Ierland en Rusland – ons nuwe tuislande; kafee’s en Airbnb’s – ons kantoor. As aanlyn Engelsonderwysers was die wêreld ons oester, en avontuur ons daaglikse realiteit.
Híér is HOE ons dit gedoen het:
Doen ‘n TEFL-kursus:
‘n TEFL-sertifikaat kwalifiseer jou as Engelsonderwyser vir tweede- en derdetaalsprekers. Hierdie kursusse kan aanlyn voltooi word en moet minstens 120 uur lank wees. Klik hier vir ons aanbevole kursus saam met ESL Starter. Daarna kan jy aansoek doen by verskeie skole en agente in China of Europa. Esljobsworld is ’n betroubare wegspringplek vir werk soek. Ons het weeksdae tussen 13:00 en 23:00 deur Skype en WeChat klasgegee. Betaling wissel tussen $4 en $20 per klas. Sodra jy genoeg studente het vir ‘n standvastige inkomste, kan jy jou reis begin beplan. Dit kan tussen drie en twaalf maande neem om hierdie teiken te bereik.
Beplan:
Daar is heelwat dinge om te oorweeg en in gedagte te hou. Eerste, en dalk die belangrikste – visums. Maak seker van die visumvereistes en waarvandaan jy aansoek kan doen. Ons het besluit om deur Suidoos-Asië te toer, aangesien Suid-Afrikaners by die meeste van hierdie lande ‘n 30-dae visum by aankoms ontvang. ’n Toeriste-visum is aanvaarbaar, aangesien jy jou inkomste aanlyn verdien. Klik gerus hier om meer uit te vind oor jou Suid-Afrikaanse visum, of volg dié skakel vir meer oor visumvrye reise vir Suid-Afrikaners. Langtermyn avontuur kom ook met al die draadwerk, werklikhede en verantwoordelikhede van enige ander werk. Doen dus navorsing oor lewenskostes (veral kos, vervoer en verblyf) en stel ’n begroting op.
Jou roete…
Die weer in die buiteland, veral Asië, kan onplesierig wees en neig na uiterstes. Neem dus verskillende seisoene in berekening wanneer jy jou roete-uitleg doen. Plaaslike toerismeskedules en seisoene beïnvloed ook vlugpryse. Maak gebruik van laekoste webwerwe soos Cheap Flights vir goeie pryse en bespreek minstens twee maande vooruit. Dieselfde reël geld vir verblyf.
Eers in jou keurland, is publieke vervoer,Uber en Grab, jou beste maat. Stap of fietsry bly egter die beste manier om alles in te neem en ‘n egte gevoel van ‘n bestemming te bekom. Die Maps.me-toep is baie handig, veral wanneer al die strate dieselfde begin lyk en jy nie jou huis kan opspoor nie. Dit werk sonder ‘n simkaart en kaarte kan vooraf afgelaai word sodat jy altyd weet waar jy is.
Verblyf:
Daar is ‘n rede hoekom sekere dorpe en areas baie populêr is onder toeriste, maar probeer ook om ‘n dorp of twee te besoek waar min of geen toeriste is nie. Dit bied insig tot die ware kultuur van ‘n land en kweek ‘n unieke waardering. Bespreek verblyf op AirBNB of Booking.com. Wees ingestel op kwaliteitresensies van vorige reisigers. Wees ook op die uitkyk vir plekke met goeie wi-fi – daarsonder is jou klasgee en inkomste dalk daarmee heen.
SIM-kaarte, bankkaarte en oopkaarte
Wi-Fi, WhatsApp en Skype maak bel maklik. ‘n Sim-kaart kom wel handig te pas vir toeps soos Uber. Wat finansies betref, beveel ons kitsbanke (ATM’s) aan. Geldwisselaars vra gereeld hoë tariewe en kan agterbaks wees. Ons het ons Suid-Afrikaanse bankkaarte gebruik in 10 lande sonder enige probleme. Onthou om jou bank in kennis te stel. Capitec het die laagste kostes vir buitelandse reise. Verder is die toep XE handig om kop te hou met al die verskillende wisselkoerse. Reisversekering kan ook oorweeg word. Dit is vir sommige lande ‘n vereiste, en dek gewoonlik mediese onkostes en persoonlike besittings. Zürich (nou bekend as Bryte) het vir ons ‘n goeie pakket gebied.
Kultuurkaskenades en kommunikasie:
Weet sommer nóú: Engels is gereeld ‘n skaars kommoditeit. Gebare en hul betekenisse verskil ook van die Suid-Afrikaanse konteks. In Asië roep die mense mekaar byvoorbeeld met ‘n handgebaar soos wat ons iemand gewoonlik sou wegstuur. Moet jou egter nie bekommer nie, Google Translate is gratis en ook vanlyn beskikbaar. Meer as dit, is mense amper altyd bereid om te help – al is dit deur gebroke sinne of mimiekkuns.
Met seën van God af was dit die avontuur van ’n leeftyd, en is dit ons absolute plesier om nou, via die visie en missie van Reis Afrikaans, ander te bemagtig en met mekaar te verbind.
Sophia en Johan was voormalig werksaam in Asië sowel as Engeland. Vir meer oor hulle, besoek die Reis Republiek.
